ငါလုပ်နေတဲ့ အလုပ်က ငြီးငွေ့စရာကောင်းတယ်လို့ ထင်နေတဲ့သူတွေ ဖတ်ကြည့်ပါ

လူတော်တော်များများက နေရာတစ်ခုရောက်ရင် ကိုယ်ကြိုးစားပမ်းစား လုပ်လာတာတွေကိုပဲ ထပ်ကာတလဲလဲ လုပ်ရမှာ ငြီးငွေ့လာတတ်ကြတယ်. ဥပမာ ကွန်ပျူတာရှေ့မှာထိုင်ပြီး နေ့စဉ်အလုပ်လုပ် နေသူဟာ ငါ့အလုပ်က အညောင်းမိလိုက်တာ Travel vloger တွေသာဆို လှုပ်လှုပ်ရှားရှားနဲ့ သဘာဝရှုခင်းတွေကြည့်ရင်း သိပ်ကိုအပန်းပြေမှာပဲ လို့ တွေးမိနိုင်ပါတယ်. Travel vloger တစ်ယောက်ဟာလည်း ရာသီဥတု သာယာသည်ဖြစ်စေ ၊ မသာယာသည်ဖြစ်စေ သွားလာနေရတာကို ငြီးငွေ့ပြီး အဲကွန်းအခန်းထဲမှာ coding လေးထိုင်ရေးနေရတဲ့ ဘဝကို တမ်းတချင် တမ်းတမိကြမှာပါပဲ……

စာရင်းကိုင်ဖြစ်အောင် ကြိုးစားခဲ့သူက စာရင်းတွက်ရမှာ ငြီးငွေ့တယ်. ဆောင်းပါးရေးတဲ့ အလုပ်ကိုရွေးချယ်ခဲ့သူလည်း စားရေးရတာကို ငြီးငွေ့သလို သရုပ်ဆောင် တစ်ယောက်ဟာလည်း အမြဲတမ်း အစစ်အမှန်မဟုတ်တဲ့ ဟန်ပန်မူယာတွေကြားမှာ ဟန်လုပ်သရုပ်ဖော်နေရတာကို ငြီးငွေ့လာနိုင်ပါတယ်…..

ဒီလို ကိုယ်ရှင်သန်တဲ့ ဝန်ကျင် ၊ ကိုယ့်ရဲ့ လုပ်ငန်းခွင်မှာ ပျော်စရာ မရှိတော့ဘူး၊ ပျင်းလိုက်တာလို့ တွေးမိနေပြီဆိုရင်တော့….

– ဒီအလုပ်ကိုရလာအောင် ကြိုးစားခဲ့တဲ့ နေ့ရက်တွေကို တွေးကြည့်ပါ

-ဒါကိုရဖို့ ရင်ဆိုင်ခဲ့ရတဲ့ အခက်အခဲတွေကို ပြန်အမှတ်ရကြည့်ပါ

-ဒါကိုရဖို့ ရင်းနှီးမြှုပ်နှံခဲ့ရတဲ့ အချိန်တွေ ငွေတွေကို ပြန်တွက်ကြည့်ပါ

– ဒီလိုဖြစ်လာဖို့ ပံ့ပိုးပေးခဲ့သူတွေရဲ့ မျက်နှာကို ပြန်ထောက်ကြည့်ပါ

အားလုံးသိထားပြီး အားလုံးလည်းခံစားဖူးတဲ့ အမှန်တရားတစ်ခုပြောပါမယ်. ပိုက်ဆံရတဲ့ အလုပ်တိုင်းက မလွယ်ကူသလို အမြဲတမ်းပျော်စရာ ကောင်းနေမှာမျိုးလည်းမဟုတ်ပါဘူး. ပျော်စရာတွေကိုပဲ လိုက်ရှာနေမယ်ဆိုရင်လည်း သေချာတာက ငွေပါထပ်ကုန်အုံးမှာပါ. ဒါကြောင့် အလုပ်က ငြီးငွေ့စရာကောင်းတယ်လို့ ထင်လာရင် ပြောပြခဲ့တဲ့ အချက်တွေကို ပြန်တွေးပါ . ဒီအလုပ်ဟာ ငါ့အတွက် ငါ့မိသားစုအတွက် လူမှုရေး ၊ စီးပွားရေး ၊ ကျန်းမာရေး ၊ ပညာရေး အားလုံးကို အဆင်ပြေစေမယ့် အရာဖြစ်လို့ ငါစွမ်းစွမ်းတမံ ကြိုးစားလုပ်မယ်ဆိုပြီး ကိုယ့်ကိုယ်ကို အားမွေးလိုက်ပါလို့ ပြောချင်ပါတယ်…..